पत्रकार महासंघको केन्द्रीय कार्यालयमा तालाबन्दी

बैशाख १८  काठमाडौं। विधिसम्मत अधिबेशनको माग गर्दै ११ दिनदेखि भोक हड्तालमा उत्रेका कास्कीका पत्रकारहरुले नेपाल पत्रकार महासंघको केन्द्रीय कार्यालयमा पनि तालाबन्दी गरेका छन् । आफ्ना मागको कुनै सुनुवाई नभएको भन्दै बिहान पोखराका पत्रकाहरुले तालाबन्दी गर्दै आमरण अनसन सुरु गरेका छन् । अधिबेशन नै नगरी दल निकट पत्रकार संगठनले होटलमा बसेर रातारात आफु निकटलाई जिल्ला समिति र सभासद चयन गरेको बिरोधमा कास्कीका केही पत्रकाहरुले तालाबन्दी र आमरण अनसनमा सुरु गरेका हुन् ।

यसैबीच तालाबन्दीका कारण दावी विरोध कार्यक्रम प्रभावित भएको छ । नेपाल पत्रकार महासंघको नयाँ नेतृत्व चयनका आज उम्मेद्वारी माथिको दावी विरोध र उम्मेद्वारी फिर्ता तय गरिएको छ । दिउँसो २ बजेदेखि बेलुका ६ बजेसम्ममा उम्मेद्वारी फिर्ता लिने निर्वाचन समितिको कार्यक्रम छ । अध्यक्षका लागि हिजो पाँच जनाले उम्मेद्वारी दर्ता गराएका छन् ।