झलनाथ नेतृत्वको वर्तमान सरकार ढल्छ: उपेन्द्र यादव

 फागुन १५ बुटवल । मधेसी जनअधिकार फोरम नेपालका अध्यक्ष उपेन्द्र यादवले एमाले माओवादीबीचको असमझदारी अन्त्य नहुँदासम्म आफ्नो पार्टी सरकारमा सहभागी नहुने बताउनुभएको छ ।

बुटवलमा आइतबार आयोजित पत्रकार सम्मेलनमा उहाँले एकदुई मन्त्रालय दिने र सरकारमा सहभागी बनाउने सर्तमा मात्र आफूहरु सरकारमा नजाने स्पष्ट गर्नुभयो ।

उहाँले भन्नुभयो ’दुई दलले शान्तिप्रक्रिया टुङ्गोमा पुर्‍याउने, समयमै संविधान निर्माण गर्ने र सङ्घीय लोकतन्त्रलाई संस्थागत गर्ने विश्वसनीय आधार तयार गर्नुपर्छ ।’

गृहमन्त्रालयका लागि माओवादी र एमाले एकआपसमा लड्दा झलनाथ नेतृत्वको वर्तमान सरकार तुहिने सम्भावना बढेकोसमेत उहाँले बताउनुभयो ।

अध्यक्ष यादवले संविधान नबन्दासम्म संविधानसभाको समय नसकिने भन्ने सर्वोच्चको आदेश चित्तबुझ्दो नभएको भन्दै भन्नुभयो(’संविधान बनाउने कुरो न्यायिक नभएर राजनीतिक हो, राजनीतिक मामिलामा सर्वोच्चले अनावश्यक हस्तक्षेप गर्नु उचित हुँदैन ।’ रासस