माछाको उत्पादन नियमित बजारमा वितरण गर्न नसक्दा किसानहरु समस्यामा

कुल तामाङ्
 फागुन १२ नुवाकोट। जिल्लाको पहिचानको रुपमा विकास हुदै गएको ट्राउट माछाको मुल्य घटाउन किसानलाई विज्ञहरुले सुझाव दिएका छन् । किसानहरुले एकलौटी ढंगबाट ट्राउट माछाको मुल्य बढाएको भन्ने गुनासो आएपछि विज्ञहरुले पनि मुल्य घटाएर विक्रि वितरण गर्न सल्लाह दिएका हुन् ।

ककनीको दोभानमा माछा पालक किसानसंग भएको अन्तरक्रियामा सहभागीहरुले माछाको गुणस्तर कायम नराखेमा व्यवसाय नै संकटमा पर्ने समेत चेतावनी दिएका छन् । अहिले किसानहरुले ट्राउट माछा प्रतिकिलो १ हजार रुपैयादेखि १ हजार २ सय रुपैया सम्ममा विक्री गर्दै आएका छन् ।

माछा महंगो भएपछि अहिले विक्रीमा कमी आएको किसानहरु बताउँछन् । एककिलो माछा उत्पादन गर्दा ७ सय रुपैया खर्च हुने जानकारी दिँदै त्रिशूली मत्स्य अनुसन्धान केन्द्रका प्रमुख साधुराम बस्नेतले केही रेष्टुरेन्टको कारण महंगिएको माछाको भाउका कारण सर्वसाधारणमा मार परेको बताउनुभयो । भुराको उत्पादन बढी हुने र पोखरीको माछा समयमा विक्री नहुदा भुरा खेर जाने संभावना बढेको ट्राउट माछा पालक किसान सहकारीका अध्यक्ष मदन लामाले बताउनुभयो ।

एक गाउ एक उत्पादन नुवाकोटको आयोजनामा भएको छलफलमा सहभागी विज्ञहरुले माछाको मुल्य घटाउन र गुणस्तर कायम गर्नु पर्नेमा जोड दिएका छन् । माछाको उत्पादन बढेको तर नियमित बजारमा वितरण गर्न नसक्दा केही किसानहरु समस्यामा समेत परेको बताईको छ ।

नुवाकोट उद्योग बाणिज्य संघका अध्यक्ष तथा एक गाउ एक उत्पादन कार्यक्रममा संयोजक शरण उत्सुक सापकोटाले किसानहरुले दाना, भुरा, माछाको मुल्यमा एक रुपता ल्याउन र सेवाको गुणस्तरलाई कायम राखेमा मात्र किसानहरुको भविष्य रहने बताउनुभयो । एक गाउ एक उत्पादन कार्यक्रमले ट्राउट प्रवद्र्धनमा सघाईरहेको नुवाकोटमा ५० परिवार माछा पालनमा संलग्न छन् ।

जिल्लामा ८ गाविसका ३ सय ५० वटा पोखरीमा माछा पालन भईरहेको छ । गत बर्ष ६० मेट्रिक टन माछा उत्पादन भएको थियो ।