सरकारले स्वास्थ्यकर्मीको निगरानीमा अब औषधि खुवाउने

चैत २४ काठमाडौं । 

सरकारले आउने वर्षदेखि चिकित्सकको निगरानीमा मात्रै औषधि खुवाउने भएको छ । सरकारले हात्तीपाइले रोग विरुद्धको औषधी वितरणका क्रममा कमजोरी भएको स्वीकार गर्दै चिकित्सकको निगरानीमा व्यवस्थापकिय लापरवाही र पर्याप्त सुचनाको अभावका कारण हात्तीपाइले रोगको औषधी वितरणमा कमजोरी भएको सरकारले स्वीकार गरेको हो । हात्तीपाईले विरुद्धको औषधी सेवन गर्दा सर्वसाधारण नागरिकको मृत्यु भएको विषयमा संसदको महिला बालबालिका तथा समाज कल्याण समितिले गरेको छलफलमा स्वास्थ्य सचिव प्रबिण मिश्रले औषधीको गुणस्तर भन्दापनि व्यवस्थापकिय कमजोरीका कारण सर्वसाधारणहरु बिरामी परेको स्विकार गर्नुभयो ।

विश्व स्वास्थ्य संगठनकै मापदण्ड अनुरुप नै नेपालमा पनि औषधी खुवाईए पनि पर्याप्त सुचनाको अभावले समस्या सृजना भएको उहांको भनाइ थियो । त्यस्तै स्वास्थ्य सेवा विभागका महानिर्देशक डा. यशोबद्र्धन प्रधानले आगामी वर्षदेखि घर घरमा गएर औषधी वितरण गर्नुको सट्टा स्वास्थ्य केन्द्रमा चिकित्सकहरुको प्रत्यक्ष निगरानीमा वितरण गरिने बताउनुभयो ।

हात्तीपाइलेको औषधी खाली पेटमा खान नमिल्ने भएकाले आगामी वर्षदेखि स्वास्थ्य केन्द्रमै केही खुवाएर औषधी खुवाइने उहांले स्पष्ट पार्नुभयो । बैठकमा सभाषद्हरुले गुणस्तरहिन औषधीका कारण क्षती भएको भन्दै छानबिन गर्न माग गरेका थिए । औषधी सेवनपछि बांके, सप्तरी र उदयपुरमा गरी ८ को मृत्यु भएको थियो भने ६ सय बढी बिरामी परेका थिए ।