दुई सदनात्मक व्यवस्थापिकाको व्यवस्था गर्न दलहरुबीच सहमति

 फागुन १७ काठमाडौं।   संबैधानिक समिति अन्तर्गतको उपसमितिले नयाँ संविधानमा सङ्घीय व्यवस्थापिका दुई सदनात्मक बनाउने सहमति गरेको छ । उपसमितिको मंगलवार बसेको बैठकले केन्द्रीय संसद दुई सदनात्मक बनाउने सहमति गरेको उपसमिति संयोजक एवं माओवादी अध्यक्ष पुष्पकमल दाहाल प्रचण्डले जानकारी दिनुभयो ।

 प्रतिनिधित्वको आधार र नेतृत्वबारे आगामी बैठकमा छलफलल हुने उहाँले बताउनुभयो । यसअघि माओवादीले केन्द्रीय संसद एक सदनात्मक हुने अडान राख्दै आएको थियो । प्रचण्डले आजको छलफल असाध्यै सकारामक र रचनात्मक रहेको दावी गर्नुभयो । प्रतिनिधिसभा र राष्ट्रियसभाको रुपमा केन्द्रीय संसद दुई सदनात्मक रहने सहमति भएको काङ्गे्रस संसदीय दलका नेता रामचन्द्र पौडेलले बताउनुभयो ।

केन्द्रीय व्यवस्थापिकासम्बन्धी विवाद टुङ्गिएपछि धेरै प्रश्न हल हुने पौडेलले बताउनुभयो । संवैधानिक समितिका सभापति निलाम्बर आचार्यले पहिलो दिनको छलफल सरकारात्मक रहेकोले फागुन मसान्तसम्म विवाद टुङ्गिने विश्वास व्यक्त गर्नुभयो । प्रादेशिक सदन एक सदनात्मक बनाउने विषयमा यसअघि उच्चस्तरीय कार्यदलले सहमति जुटाएको थियो ।

उपसमितिको अर्को बैठक पर्सि बिहीबार बस्ने छ ।