रसुवाको गतलाङ गाउँमा पर्यटकका लागि ‘होम स्टे’सञ्चालन

कूल तामाङ्

 चैत १४ रसुवा।पर्यटन वर्ष २०११ लाई लक्ष्य गर्दै तामाङ सम्पदा मार्गअन्तर्गत गतलाङ गाउँमा पर्यटकका लागि ‘होम स्टे’सञ्चालन गरिएको छ । उत्तरी रसुवाको गतलाङ गाउँमा आगन्तुक पर्यटकलाई गुणस्तरीय खानपिन र बसोबासको व्यवस्था मिलाई प्राप्त आयले जीवनस्तरमा सुधार ल्याउन गत हप्तादेखि आफूले आठवटा शैया क्षमताको होम स्टे सञ्चालनमा ल्याइसकेको र पर्यटकहरू नयाँ होमस्टेमा बस्न सुरु गरिसकेको राजेश लामाले जानकारी दिनुभयो ।

स्थानीयस्तरमा उत्पादन भएको मकै, कोदो र जौको पिठोबाट तयार भएको ढिँडो र सिस्नु, सिमी, मुला र आलु एवम् सागबाट बनेका तरकारी खुवाउने गरेको छु,लामाले भन्नुभयो–मैले सञ्चालनमा ल्याएको होम स्टेमा बस्न आएका पर्यटक स्थानीय खानाबाट नै प्रफुल्ल भई फर्कनथालेका छन् ।

तामाङ संस्कृतिमा वैभवशाली गतलाङ क्षेत्रको प्रचारप्रसारबाट पर्यटक भित्र्याई स्थानीय रसास्वादन दिलाउन होम स्टे व्यवस्थापन समिति गठन गरिसकेको र अन्य सातवटा होम स्टे सञ्चालनमा ल्याउने अन्तिम तयारी भइसकेको बताइएको छ ।

यस्तै,पर्यटन कार्यक्रमअन्तर्गत पाँच वर्षअगाडि देखि सञ्चालनमा आएको सामुदायिक पर्यटकीय लजले पाहुनाहरू माझ सेवा पु¥याउन धौधौ बनिरहेका बेला नयाँ होम स्टेले पर्यटकलाई आकर्षण गरेको पर्यटन व्यवसायीहरूले बताउनुभयो ।