हात्ती आतंकबाट २८ जनाको मृत्यु

एस बी गौतम फागुन ३ झापा ।

झापाको बाहुनडाँगी गाविसमा जंगली हात्तीबाट २८ जनाले ज्यान गुमाइसक्दा पनि राज्यका तर्फबाट बेवास्ता गरिएको पीडित पक्षले बताएको छ । प्रकृति संरक्षण समाज झापा तथा बाहुनडाँगी गाविसले आज राजधानीमा पत्रकार सम्मेलन गर्दै वन्यजन्तुबाट हुने क्षतिपूर्ति दिने गजेटमा उल्लेख भए पनि २० महिना बित्दासमेत पीडितले नपाएको जानकारी दिए । समाजका अध्यक्ष अर्जुनकुमार कार्कीले नेपाल र भारतबीच अन्तर सिमाना संरक्षणका लागि नयाँ दिल्लीमा भएको सम्झौता व्यवहारमा परिणत हुन नसकेको बताउनुभयो । हात्ती आतंकबाट वर्षेनी सयौं बिघा जमिनको खेतबाली नष्ट गरेको तथा पीडित गरिब, किसान एवं निम्न आर्थिक स्तरको रहेको कार्कीको भनाइ थियो । समाजले राज्यका तर्फबाट  मेची खोला किनारमा तटबन्धन गरी बाटो निर्माण गर्नुपर्ने, तुरुन्त अन्नबाली तथा जीउधनको क्षतिपूर्ति दिनुपर्ने, संरक्षणमा खटिएका व्यक्तिको विमा गर्नुपर्ने, थप सुरक्षाबलको व्यवस्था मिलाउनुपर्ने, हात्तीलाई प्राकृतिक वासस्थानमा फर्काउन सुरक्षाकर्मी तथा स्थानीय क्षेत्रमा सवारी साधनको व्यवस्था गर्नुपर्ने तथा मर्मतसम्भारका लागि सामग्री उपलब्ध गराउनुपर्ने माग राखेको सचिव निरज घिमिरेले जानकारी दिनुभयो ।