सोम सुनुवार चैत २५ इलाम ।
इलाममा विद्यालय बाहिर रहेका वालवालिकालाई विद्यालयमा शतप्रतिशत भर्ना गराउनका लागि जिल्ला शिक्षा कार्यालयले भर्ना अभियान साचालन गर्ने भएको छ । कार्यालयको आयोजनामा इलाममा भएको सरोकारवालाको वैठकमा भएको छलफलमा आगामी शैक्षिक सत्र २०६८ मा घरदैलो अभियान साचालन गरी विद्यार्थी भर्ना गराउने जानकारी गराईएको हो ।
जिल्ला शिक्षा कार्यालय इलामले गरेको सर्भेक्षणका क्रममा चार हजार एकसय ३८ जना पाँच वर्षदेखि १५ वर्ष उमेर समूहका बालबालिका विद्यालय बाहिर रहेकोले उनीहरुलाई विद्यालय भर्ना गराउने लक्ष्य राखिएको जिल्ला शिक्षा अधिकारी महेन्द्रप्रसाद पौडेलले बताउनुभयो । भर्ना अभियानलाई प्रभावकारी बनाउन आगामी वैशाख २ गतेदेखि वैशाख १३ गते सम्म भर्ना हुन विद्यालय आउने विद्यार्थीलाई नियमित भर्ना गराउने कार्यक्रम रहेको छ ।
वैशाख १३ गतेसम्म विद्यालय भर्ना हुन नआएका बालबालिकालाई प्रधानाध्यापक विद्यालय व्यवस्थापन समितिका पदाधिकारी स्थानीय संघसंस्थाका प्रतिनिधि तथा अभिभावकको सहयोगमा घरमै गई प्रेरित गरेर वैशाख १४ गतेदेखि २५ गतेसम्म भर्ना गराउने निर्णय भएको छ । भर्ना अभियानकालागि श्रोतकेन्द्रस्तरमा श्रोतव्यक्तिको संयोजकत्वमा र विद्यालयमा प्रधानाध्यपकको संयोजनकत्वमा कार्यक्रम गर्ने जनाईएको छ ।
