वैशाख १९ एजेन्सी ।
Read More......
अन्तर्राष्ट्रिय आतङ्कवादी सङ्गठन अलकायदाका प्रमुख एवम् संस्थापक नेता ओसामा विन लादेन मारिएको अमेरिकी साचार माध्यमहरुले जनाएका छन् । अधिकारीहरुलाई उद्धृत गर्दै प्रकाशित समाचारमा लादेनको शव अमेरिकाको नियन्त्रणमा रहेको बताइएको छ ।
अमेरिकी राष्ट्रपति बाराक ओबामाले देशबासीको नाममा सम्बोधन गर्दै लादेन मारिएको पुस्टि गर्नुभएको छ । ओबामाले लादेनलाई अफगानिस्तान र पाकिस्तानको सीमा क्षेत्रमा लुकेर बसेको अवस्थामा सैनिक कारवाहीमा मारिएको पुस्टि गर्नुभएको छ ।
अगस्ट २०१० मा पहिलोपटक सुराक मिलेपछि खोजि थालेको सेनाले विशेष सुराकीका आधारमा एक हप्तादेखि सुरु गरिएको विशेष कारवाहीका क्रममा लादेन मारिएको ओबामाले बताउनुभएको छ । आतङ्कका विरुद्धमा अमेरिका सधैँ लडिरहने उहाँको भनाइ छ । विन लादेन मारिएपछि चरमपन्थीहरुका कारण पीडा भोगिरहेकाहरुले न्याय पाएको राष्ट्रपति ओबामाको भनाइ छ ।
ईस्लाम धर्मको विरुद्धमा जाने अमेरिकाको कुनै सोच नभएको बताउँदै सम्बोधनमा ओबामाले लादेन इस्लामी नभएको समेत बताउनुभएको छ । ४० मिनेटसम्म भएको कारवाहीमा कोही अमेरिकी सैनिक हाताहात नभएको अमेरिकाको दाबी छ । विन लादेन मारिएको खबर राष्ट्रपतिले पुस्टि गर्नुभएपछि सडकमा उत्रिएका अमेरिकी नागरिकहरु यतिखेर खुसियाली मनाइरहेका छन् । लादेनको योजनामा सन् २००१ सेप्टेम्बर ११ मा ट्वीन टावरमा हवाई आक्रमण गरिएको अमेरिकाको आरोप छ ।
